ಜನರೇಟಿವ್ AI ನಿಷೇಧಿತ ಬಳಕೆಗೆ ಸಂಬಂಧಿಸಿದ ನೀತಿ

ಕೊನೆಯ ಬಾರಿ ಮಾರ್ಪಡಿಸಿರುವುದು: ಡಿಸೆಂಬರ್ 17, 2024

ಜನರೇಟಿವ್‌ AI ಮಾದರಿಗಳು ನಿಮಗೆ ಎಕ್ಸ್‌ಪ್ಲೋರ್ ಮಾಡಲು, ಕಲಿಯಲು ಮತ್ತು ರಚಿಸಲು ಸಹಾಯ ಮಾಡಬಹುದು. ನೀವು ಅವುಗಳೊಂದಿಗೆ ಜವಾಬ್ದಾರಿಯುತ, ಕಾನೂನು ಮತ್ತು ಸುರಕ್ಷಿತ ರೀತಿಯಲ್ಲಿ ತೊಡಗಿಸಿಕೊಳ್ಳಬೇಕೆಂದು ನಾವು ನಿರೀಕ್ಷಿಸುತ್ತೇವೆ. ಈ ನೀತಿಯನ್ನು ಉಲ್ಲೇಖಿಸುವ Google ಉತ್ಪನ್ನಗಳು ಮತ್ತು ಸೇವೆಗಳಲ್ಲಿ ಜನರೇಟಿವ್‌ AI ನೊಂದಿಗೆ ನಿಮ್ಮ ಸಂವಾದಗಳಿಗೆ ಈ ಕೆಳಗಿನ ನಿರ್ಬಂಧಗಳು ಅನ್ವಯಿಸುತ್ತವೆ.

1. ಅಪಾಯಕಾರಿ ಅಥವಾ ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ತೊಡಗಬೇಡಿ, ಅಥವಾ ಅನ್ವಯಿಸುವ ಕಾನೂನು ಅಥವಾ ನಿಯಮಗಳನ್ನು ಉಲ್ಲಂಘಿಸಬೇಡಿ. ಇದು ಈ ಕೆಳಗಿನ ಕಂಟೆಂಟ್‌ ಅನ್ನು ರಚಿಸುವುದು ಅಥವಾ ವಿತರಿಸುವುದನ್ನು ಒಳಗೊಂಡಿರುತ್ತದೆ:
   1. ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಅಥವಾ ಶೋಷಣೆಗೆ ಸಂಬಂಧಿಸಿರುವುದು.
   2. ಅತಿರೇಕದ ಹಿಂಸೆ ಅಥವಾ ಭಯೋತ್ಪಾದನೆಯನ್ನು ಉತ್ತೇಜಿಸುವಂತಹದ್ದು.
   3. ಖಾಸಗಿ ಕ್ಷಣಗಳ ಒಪ್ಪಿಗೆಯಿಲ್ಲದ ಚಿತ್ರಣವನ್ನು ಉತ್ತೇಜಿಸುವಂತಹದ್ದು.
   4. ಸ್ವಯಂ-ಹಾನಿಯನ್ನು ಉತ್ತೇಜಿಸುವಂತಹದ್ದು.
   5. ಕಾನೂನುಬಾಹಿರ ಚಟುವಟಿಕೆಗಳು ಅಥವಾ ಕಾನೂನಿನ ಉಲ್ಲಂಘನೆಗಳನ್ನು ಉತ್ತೇಜಿಸುವಂತಹದ್ದು - ಉದಾಹರಣೆಗೆ, ಅಕ್ರಮ ಅಥವಾ ನಿಯಂತ್ರಿತ ವಸ್ತುಗಳು, ಸರಕುಗಳು ಅಥವಾ ಸೇವೆಗಳನ್ನು ಸಂಶ್ಲೇಷಿಸುವಂತೆ ಅಥವಾ ಆ್ಯಕ್ಸೆಸ್‌ ಮಾಡುವಂತೆ ಸೂಚಿಸುವುದು.
   6. ಗೌಪ್ಯತೆ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳು ಸೇರಿದಂತೆ ಇತರರ ಹಕ್ಕುಗಳನ್ನು ಉಲ್ಲಂಘಿಸುವುದು - ಉದಾಹರಣೆಗೆ, ಕಾನೂನುಬದ್ಧವಾಗಿ-ಅಗತ್ಯವಿರುವ ಒಪ್ಪಿಗೆಯಿಲ್ಲದೆ ವೈಯಕ್ತಿಕ ಡೇಟಾ ಅಥವಾ ಬಯೋಮೆಟ್ರಿಕ್ಸ್‌ ಅನ್ನು ಬಳಸುವುದು.
   7. ಜನರನ್ನು ಅವರ ಸಮ್ಮತಿ ಇಲ್ಲದೆ ಟ್ರ್ಯಾಕ್‌ ಮಾಡುವುದು ಅಥವಾ ಮೇಲ್ವಿಚಾರಣೆ ಮಾಡುವುದು.
   8. ಹೆಚ್ಚು ಅಪಾಯಕ್ಕೀಡಾಗಬಹುದಾದ ಡೊಮೇನ್‌ಗಳಲ್ಲಿ ಮಾನವ ಮೇಲ್ವಿಚಾರಣೆಯಿಲ್ಲದೆ ವೈಯಕ್ತಿಕ ಹಕ್ಕುಗಳ ಮೇಲೆ ಮಹತ್ವದ ಹಾನಿಕಾರಕ ಪರಿಣಾಮವನ್ನು ಹೊಂದಿರುವ ಸ್ವಯಂಚಾಲಿತ ನಿರ್ಧಾರಗಳನ್ನು ಮಾಡುವುದು - ಉದಾಹರಣೆಗೆ, ಉದ್ಯೋಗ, ಆರೋಗ್ಯ, ಹಣಕಾಸು, ಕಾನೂನು, ವಸತಿ, ವಿಮೆ ಅಥವಾ ಸಾಮಾಜಿಕ ಕಲ್ಯಾಣದಲ್ಲಿ.
2. ಇತರರ ಅಥವಾ Google ನ ಸೇವೆಗಳ ಭದ್ರತೆಗೆ ಸಂಬಂಧಿಸಿದಂತೆ ಯಾವುದೇ ರಾಜಿ ಮಾಡಿಕೊಳ್ಳಬೇಡಿ. ಇದು ಈ ಕೆಳಗಿನ ಕಂಟೆಂಟ್‌ನ ರಚನೆ ಅಥವಾ ವಿತರಣೆಯನ್ನು ಒಳಗೊಂಡಿರುತ್ತದೆ:
   1. ಸ್ಪ್ಯಾಮ್‌, ಫಿಶಿಂಗ್‌ ಅಥವಾ ಮಾಲ್‌ವೇರ್‌.
   2. Google ನ ಅಥವಾ ಇತರರ ಮೂಲಸೌಕರ್ಯ ಅಥವಾ ಸೇವೆಗಳಿಗೆ ದುರುಪಯೋಗ, ಹಾನಿ, ಹಸ್ತಕ್ಷೇಪ ಅಥವಾ ಅಡ್ಡಿಪಡಿಸುವುದು.
   3. ದುರುಪಯೋಗ ತಡೆಗಟ್ಟುವುದು ಅಥವಾ ಭದ್ರತೆ-ಸಂಬಂಧಿತ ಫಿಲ್ಟರ್‌ಗಳನ್ನು ಮೋಸದಿಂದ ತಪ್ಪಿಸುವುದು -- ಉದಾಹರಣೆಗೆ, ನಮ್ಮ ನೀತಿಯನ್ನು ಉಲ್ಲಂಘಿಸುವ ಮಾದರಿಯನ್ನು ಕುಶಲತೆಯಿಂದ ನಿರ್ವಹಿಸುವುದು.
3. ಅಶ್ಲೀಲ, ಹಿಂಸಾತ್ಮಕ, ದ್ವೇಷಪೂರಿತ ಅಥವಾ ಹಾನಿಕಾರಕ ಚಟುವಟಿಕೆಗಳಲ್ಲಿ ತೊಡಗಬೇಡಿ. ಇದು ಈ ಕೆಳಗಿನ ಕಂಟೆಂಟ್‌ ಅನ್ನು ರಚಿಸುವುದು ಅಥವಾ ವಿತರಿಸುವುದನ್ನು ಒಳಗೊಂಡಿರುತ್ತದೆ:
   1. ದ್ವೇಷ ಅಥವಾ ದ್ವೇಷಪೂರಿತ ಮಾತು.
   2. ಕಿರುಕುಳ, ನಿಂದನೆ, ಬೆದರಿಕೆ, ದುರುಪಯೋಗ ಅಥವಾ ಇತರರನ್ನು ಅವಮಾನಿಸುವುದು.
   3. ಹಿಂಸೆ ಅಥವಾ ಹಿಂಸೆಯ ಪ್ರಚೋದನೆ.
   4. ಲೈಂಗಿಕವಾಗಿ ಅಶ್ಲೀಲ ಕಂಟೆಂಟ್‌ -- ಉದಾಹರಣೆಗೆ, ಅಶ್ಲೀಲತೆ ಅಥವಾ ಲೈಂಗಿಕ ತೃಪ್ತಿಯ ಉದ್ದೇಶಕ್ಕಾಗಿ ರಚಿಸಲಾದ ಕಂಟೆಂಟ್‌.
4. ತಪ್ಪು ಮಾಹಿತಿ, ತಪ್ಪು-ಪ್ರತಿನಿಧಿತ್ವ ಅಥವಾ ದಾರಿ ತಪ್ಪಿಸುವ ಚಟುವಟಿಕೆಗಳಲ್ಲಿ ತೊಡಗಬೇಡಿ. ಅದು ಇವುಗಳನ್ನು ಒಳಗೊಂಡಿದೆ
   1. ವಂಚನೆಗಳು, ಸ್ಕ್ಯಾಮ್‌ಗಳು ಅಥವಾ ಇತರ ಮೋಸಗೊಳಿಸುವ ಕ್ರಿಯೆಗಳು.
   2. ಸತ್ಯವನ್ನು ಸ್ಪಷ್ಟವಾಗಿ ಬಹಿರಂಗಪಡಿಸದೆ ಇತರರನ್ನು ವಂಚಿಸುವ ಉದ್ದೇಶದಿಂದ ಬೇರೆ ವ್ಯಕ್ತಿಯ ರೀತಿ (ಜೀವಂತ ಅಥವಾ ಸತ್ತ) ಸೋಗು ಹಾಕುವುದು.
   3. ಸೂಕ್ಷ್ಮ ಭಾಗಗಳಲ್ಲಿ ಪರಿಣತಿ ಅಥವಾ ಸಾಮರ್ಥ್ಯದ ಕುರಿತು ಹಾದಿ ತಪ್ಪಿಸುವ ಕ್ಲೇಮ್‌ಗಳಿಗೆ ಉತ್ತೇಜನ ನೀಡುವುದು -- ಉದಾಹರಣೆಗೆ ಆರೋಗ್ಯ, ಹಣಕಾಸು, ಸರ್ಕಾರಿ ಸೇವೆಗಳು ಅಥವಾ ಕಾನೂನಿನಲ್ಲಿ, ಮೋಸಗೊಳಿಸುವ ಸಲುವಾಗಿ.
   4. ವಂಚನೆಯ ಉದ್ದೇಶದಿಂದ ಸರ್ಕಾರಿ ಅಥವಾ ಪ್ರಜಾಪ್ರಭುತ್ವ ಪ್ರಕ್ರಿಯೆಗಳಿಗೆ ಅಥವಾ ಹಾನಿಕಾರಕ ಆರೋಗ್ಯ ಅಭ್ಯಾಸಗಳಿಗೆ ಸಂಬಂಧಿಸಿದಂತೆ ಹಾದಿತಪ್ಪಿಸುವ ಕ್ಲೇಮ್‌ಗಳಿಗೆ ಉತ್ತೇಜನ ನೀಡುವುದು.
   5. ಮೋಸಗೊಳಿಸುವ ಸಲುವಾಗಿ ಮಾನವನಿಂದ ಮಾತ್ರ ರಚಿಸಲಾಗಿದೆ ಎಂದು ಹೇಳುವ ಮೂಲಕ, AI ರಚಿತವಾದ ಕಂಟೆಂಟ್‌ ಮೂಲವನ್ನು ತಪ್ಪಾಗಿ ಪ್ರತಿನಿಧಿಸುವುದು.

ಶೈಕ್ಷಣಿಕ, ಡಾಕ್ಯುಮೆಂಟರಿ, ವೈಜ್ಞಾನಿಕ ಅಥವಾ ಕಲಾತ್ಮಕ ಪರಿಗಣನೆಗಳ ಆಧಾರದ ಮೇಲೆ ಅಥವಾ ಇದರಿಂದಾಗಬಹುದಾದ ಹಾನಿಯನ್ನೂ ಮೀರಿ ಸಾರ್ವಜನಿಕರಿಗೆ ಪ್ರಯೋಜನವಾಗಬಹುದಾದ ಸಂದರ್ಭಗಳಲ್ಲಿ ನಾವು ಈ ನೀತಿಗೆ ವಿನಾಯಿತಿಗಳನ್ನು ನೀಡಬಹುದು.